حكاوي عبد الزمبار
(زمبرة ومرتو، مرات شمطة لرب السماء ومرات ديك يا الرومانسية وكده، عادي جدا. زمبرة قبل الزواج كان مدلع زوجته وبناديها بفلاليجو عشان كان عندها فلجة..وطوالي شابكها ليك يالله يا فلاليجو نمشي نحجز  الشقة، ويالله يا فلاليجو نمشي سوق الدهب عشان نشوف الدقة العاجباكي !. بعد الزواج بدأت الفواتير تنزل مطرة، وقفة الملاح ، والولد  بلع القرش. مرة زمبرة جاء داخل المطبخ قامت العتبة عترت ليهو  وقرب يقع لو ما مسك في الباب.مرتو شافتو وفقعتها ضحكة لأنو شكلو كان عجيب وهو بتترتح..قام طوالي قال ليها وهو زعلان شديد،والله ده كل منك انت يا شروم!!؟  مرتو قالت لبهو أجي يا زمبرة،انا امس ما كنت فلاليجو، متين الليلة بقيت شروم!!)..