حكاوي عبد الزمبار
(زمبرة مرة كان شغال في مدينة أوربية. البرد شديد يقطع النخرة. عندو صحبانو خواجات وروهو دكاكين خيرية  بتبيع كوتات البرد والفنايل باسعار زههيدة.  قالوا ليهو هي مستعملة لكنها بحالة جيدة. زمبرة طنش الموضوع وما اشتغل بيهو تاني...مرت أيام وليالي وكمان اسبوع، والسقط العوير ده  ما عاوز يقيف أو يخف. مشى قابل صحبانو تاني وبدون مناسبة جاب ليهم سيرة الكوتات والفنايل وخجلان  يقول ليهم المستعملة..واحد من الخواجات فقعها ليهو، وقال لزمبرة بتقصد انت الفنايل والكوتات المستعملة. وبس ولا انتظر رد زمبرة ، طوالي قال ليهو ياخي أنا هدومي دي معظمها هدوم مستعملة. لأنها رخيصة وبتساعد في الحفاظ على البيئة وكمان بتوفر شغل لكتير من الناس!! وقروش الهدوم الجديدة دي بسافر بيها إجازاتي. لحدي هنا والموضوع لزمبرة ما واقع ليهو لكن كلام الخواجه الأخير ده جهجه ليهو دفاعاتو ووقع ليهو في حنانو..تاني يوم  زمبرة دبل هدومو وردف ليهو شرابين، المقدود بي تحت  وفوقو السليم ومرق.  بعدما قرب من الدكان زمبرة  غير في مشيتو وبقى يتلفت زي الحرامي. دخل الدكان براااحة باطراف اصابعينو القربو يجمدو من البرد. هناك، طوالي قبل ليك على الكوتات والفنايل وخم ليك منها كمية ومشى يحاسب..هناك قالوا ليهو  حسابك حتدفع نصو، لأن اليوم في تخفيض خمسين في المائة، ولو عندك أسرة كمان حتاخد كل الأشتريتو مجانا. أما إذا كنت بتعمل بدوام غير كامل وبتاخد كورسات لغة أو كمبيوتر  فعندك  هنا كبونات مجانية لتختار لبستين من أشهر محلات الملبوسات لهذا الموسم.. زمبرة طوالي مسك حيطة الدكان وفكاها جاعورة بي نخجيها!!؟.)...

حكاوي عبد الزمبار
(زمبرة مرة كان ماشي في مظاهرة في مدينة لندن متوجه نحو السفارة السودانية. المظاهرة كانت احتجاجا لمقتل مهندس سوداني عليه الرحمة والرضوان في الخرطوم بحري. قتلوهو ناس جهاز الأمن السوداني. بعد أخذ إذن المظاهرة وتحديد اليوم والساعة وعدد المشاركين، الشرطة البريطانية كانت هناك لمراقبة وحراسة المظاهرة. كانت هذه المظاهرة في أوائل تسعينات القرن الماضي. الهتافات كانت بتنادي بالحرية والعدالة واحترام حقوق الإنسان في السودان. كانت في مذكرة تدين هذه الانتهاكات وتنادي بوقفها. بينما الناس كانوا بهتفوا ضد حكومة الكيزان أمام السفارة وقدامهم الحواجز الوضعتها الشرطة عشان المتظاهرين ما يتعدوا خطوط  السفارة- يا سلام على الحضارة-. في الوقت ده، خرج واحد سوداني من السفارة وهو شايل ليهو شنطة سامسونايت. سلم على الناس المتظاهرين وقال ليهم والله أنا جيت هنا اجدد جوازي وبس!. خرج واحد تاني من السفارة وبدأ يصور في المتظاهرين.  بعد شوية، تلاتة من المتظاهرين تقدموا نحو باب السفارة لتقديم المذكرة. والشرطة تراعي ساكت وتتكشم مرات!؟. مشوا داسو جرس السفارة. جاء واحد من الموظفين وقال، في شنو؟ قالوا ليهو، عندنا مذكرة دايرين نسلما للسفير. قال ليهم، دقيقة اشوفو بقول شنو؟ بعد شوية مشى وجاء راجع وقال ليهم، السفير قال ليكم مابستلما !؟.. في واحد من ناس الشرطة قال لناس المذكرة، اها، قالوا ليكم شنو؟ واحد قال ليهو، السفير قال مابستلم المذكرة. قام طوالي الشرطي قال ليهم، وكنتو بتتوقعوا شنو من الدكتاتوريين ديل !!؟.)...

حكاوي عبد الزمبار                                                  
(زمبرة مرة كان شغال في البوستة الأمريكية، في قسم توزيع وترتيب البريد. العمل شاق وممل كمان.الكرعين بتراجفو والايدين يقربو يتملصو من الجسم من شدّة التعب.  بدوهم ربع ساعة استراحة كل ساعتين عمل.  يعني عاملين فيها إنسانين وكده!. في الاستراحة دي أول ما الزول تجي استرتحتو بس جري  بردب بردلب تلقاهو اتكوم في أول  كنبة حديد قدامو !.  لأنو الشغل كلو وقوف، ما فيش قعاد خالص. أها في المعمعة دي زمبرة كان شغال ون  تو  مع خواجه، وبقو صحبان. الخواجه سأل زمبرة، منو اسم الكريم. زمبرة قال ليهو ، مهامد آلي -محمد علي- قال عشان يسهل ليهو الاسم. والاسم مشهور هنا بالراحل بطل العالم للملاكمة محمد علي كلاي. الخواجه دنقر كده ورفع راسو وعاين لزمبرة كويس واداها صنة، ثم قال، طيب أهلا ومرحبا معاك الرئيس ريتشارد نيكسون!!؟. زمبرة طوالي فقعها ضحكة وقال ليهو، طيب هاك شوف دي  بطاقتي مكتوب عليها اسمي محمد علي، يالله انت  يا بطل ورينا بطاقتك المكتوب فيها ريتشارد نيكسون!!؟)....

حكاوي عبد الزمبار
( زمبرة في الأيام الأولى لوصوله للمدينة الأوربية،  اشتغل  في منظمة حقوقية. في ساعة الغداء عزمتو زميلتو في واحد من المطاعم القريبة. هناك، اكلوا وحلوا وشربو الشاي المنعنع وتحدثوا عن كل شئ له علاقة بحملات حقوق الإنسان في العالم  وخاصة البورمية اونق سان سو شي الحائزة على جائزة نوبل للسلام _ ما تستاهل. باعت القضية وعملت اضان الحامل طرشة من إنتهاكات حقوق المسلمين في بورما بعدما فكوها من الحبس وادوها السلطة!!؟_. بعد شوية جاهم الجرسون وجاب الفاتورة. الخواجية عاينت للفاتورة بنظرة خاطفة وطلعت قروشها. دفعت نصها ودفرتها في إتجاه زمبرة ليدفع النص الباقي!. زمبرة اندهش واستغرب. هبش جيبو!!. الحمد لله. قالها بصوت منخفض.  لقى عندو قروش وإلا كان وقع على قدومو. زمبرة علق وقال ،  بالله دي إنسانية دي!!  ما عزمتني نان!!!  سمح لو كنت جيت اتغديت معاها طيارة، كانت جابت البوليس يعني!!؟.).....

حكاوي عبد الزمبار
(زمبرة مرة جاتو قرحة وإنفجرت في مدينة اوربية، وهو ماجايب خبر. صحبانو اتصلوا
بالإسعاف قام اتأخر شوية وجات عربية الشرطة وجرو بيهو المستشفى. هناك ادوه دم سريع وعملوا ليهو عملية. في اليوم التاني، جاتو بتاعت الفيزيوثربي للمشي وكده!! زمبرة قال ليها، انت بتهظري!. وانا قادر اتقلب على صفحتي لمان كمان  أقوم أمشي!! يومين تلاتة عملو ليهو اللازم وطلعوه من المستشفى. صحبانو قالو ليهو، والله يا زمبرة الله شافك. لو كنت في السودان كنا شربنا شاي وقهوة في بيت بكاك، واتكلمنا في الكورة!؟زمبرة قال ليهم والله ناس المستشفى ما قصرو معاي، ومافضل ليهم إلا يدوني حق السينما!!؟)...

حكاوي عبد الزمبار
(مرة في واحد دق الباب وطلع من جماعة البلاغ. هم مجموعة إسلامية صغيرة ومسالمة ومركزها الهند. زمبرة فتح الباب ولقى ليك واحد دقنو شدة ما طويلة لامن قرب يدخل باقيها في جيبو! هم مهذبين لكن بس عكاليت عكلتة شديدة زي التقول النسخة الاسلامية لشهود يهوه المسيحية!..شيخنا طوالي بعد السلام بدأ يتكلم عن الإسلام وبعد داك دعوة لزيارة المسجد لحضور المزيد من الدروس. زمبرة ما قال ليهم خشوا البيت، لأنو حيطان  بيتو مليانة بصور اهلو المراحيم وخائف يقولوا ليهو ده حرام. في واحد صاحبو في بيتو في تماثيل قالوا ليهو حرام، طوالي طردهم!!. زمبرة قال هو بس داير يعرف كيف الجماعة ديل بعرفو اسم الزول وعنوانو من نص ملايين الامريكيين ديل، التقول عندهم جي بي اس إسلامي!!؟.. زمبرة قال ليهم شوف ياجماعة الله واحد ، شارعنا ده أنا المسلم الوحيد الفيهو. جيراني ديل فيهم المسيحي وفيهم البوذي وفيهم المابعترف بالاديان ذاتا.. لكن مافي واحد بتدخل في حياة التاني. اسع جاري القصادي ده قسيس وهو صاحبي. هو عارفني أنا مسلم وأنا عارفو هو قسيس ولا يوم واحد قال ليا تبقى مسيحي معانا ولا أنا قلت ليهو تبقى مسلم معانا. مرات بسافر وبحرسني بيتو وكمان أنا مرات بسافر بحرسو بيتي وبمسك ليا جواباتي، وهو كمان بصلح لي حاجات بيتي المكعكعة، مجانا!!. وفي اعياد الميلاد بجيبو لينا هدايا للأولاد، وفطومة مرتي،  ما بتقصر معاهم بتودي ليهم الكعك والبديفور والمنين في عيد الفطر  وبعجبهم وصاحبي  القسيس ده بموت فبهو عديل كده، والحالة عندو سكري!! بس اختلافي مع صاحبي القسيس ده، هو بأيد الحزب الجمهوري وأنا بأيد الحزب الديمقراطي. بس ما بنتكلم خالص في السياسة، لكن مرتو، مرة مرة بترمي الكلام وبتفقعو !! وأنا زمبرة القدامكم ده مرات براعي العشرة وبعمل رايح، ومرات بديها في التنك!!!؟.)....

حكاوي عبد الزمبار
(زمبرة وفطومة مرتو عايشين في سبات ونبات يحدي ما يوم فطومة قالت لزمبرة ،انا دايرة اشتغل في مصنع. المصنع يصنع المخدات الهوائية البركبوها في دركسونات العربات للوقاية من الحوادث. الشغل قروشو كتيرة لكن حاااار  وساعاتو طويلة، الوردية ١٦ ساعة والعمل ٣ ابام. العمل ده عاوز دقة شديدة في تركيب الصواميل الصعنونة واليايات والورد والقفايص ثم بعد داك وضع قذيفة الشعلة البتخلي المخدة الهوائية تفتح ساعة الانفجار. زمبرة قدر ما حاول يمنع فطومة ما قدر. الرإس زلطة. فطومة وسطت ليهو اخوه الكبير فهو يعمل هناك.. فقال لزمبرة ياخي خليها تجرب. في اليوم التاني لبست الابرول وشالت معاها أسلحة الدمار الشامل،شي سندوتشات وشي عصاير وشي حبوب وجع راس ولبان لزوم السهر وكده. الزوجة المصون اتوجهت للعمل بعدما رددوا الشهادة، زمبرة نص وفطومة تمت النص التاني..تاني يوم وبعد انتهاء العمل فطومة اتأخرت. وزمبرة يعاين للساعة كل دقيقة. بعد شوية ما يسمع ليك إلا كب كرب على الباب. زمبرة فتح الباب وما يلقى ليك إلا فطومة ذاتا مكومة في الواطة وبتحبي والنفس طالع ونازل. طوالي قال ليها، اسمعي هنا، ده آخر يوم ليك للشغل ده..فطومة قالت ليهو،  طلعت صوت بلسانا ما بتكتب بالعربي ومعاها دنقيرة براسها وتعني الموافقة والتسليم التام. حاول زمبرة حملها لداخل الشقة الإ أنه ما قدر، فجراها جر للداخل وهو يتمتم بصوت مسموع ابو الامبربالية الامريكية ذاتا الدايرا تودر لينا فطومة!!!؟).....